کیوسک kiyusk


روشنایی های شهر şəhərin ışıqları

ərdəbil

"اردبیل"...

شهریمیز آغ ایدی

اللریمیز قارا

دئیردیلر اوره گیمیز قیرمیزیا چالیر

چالدیردی بئینیمیزده بیر آکاردئونچو

گوزل سونلو بیر فیلمین هاواسینی

سن بیر سمفونیه بنزه ییردین

بتهوونین کئفلی کئفلی بارماقلاریندا

قورمارا اوتموش بیر پئنجه ییدیم من

قیزدیریردیم اردبیلین سئرچه لرین

قیزاردیردیم سئوگیمین دوداقلارینی

شاه ایسماعیلین بورکوندن دووشانلار چیخاردیردیم

گولوردو شیطان تورونا دوشموش گونش...

بیزیم گونشیمیزین یئددی گوزو واریدی

هورولموش ساچلاریمیزلا باغلایاردیق گوزلرینی

کورپولر اوستونده دنیزه اوچاردیق

گمی لر رویالاریمیزلا دولو

دونوردولر شهریمیزین خیابانینا

بیز یالنیزلاییب بالیقلی چاییندا

بالیق قولاقلارینا کیچیک قارا بالیقین

حیکایه سینی اوخویوردوق

و سیگارئتله ریمیزله سئوگی میزین گوزلرینی اونودوردوق...

گوزلرینیز آیدین

قار یاغیب اوره گیمیزه

قار یاغیب رویالاریمیزین ساچینا

قار یاغیب کیچیک قارا بالیقین آدینا

ایندی تکجه قارا قارقاییق

و آغاجلار اوستونده کی فیلمین سونو

نه سویوق دور...

#لیلا_نوروزی

 

https://telegram.me/joinchat/BYWbMj-LWhFXLLZZ_drNng

   + لیلا نوروزی - ۱۱:٥۸ ‎ق.ظ ; یکشنبه ۱ امرداد ۱۳٩٦